Likwide middelen wiest op de aktiva in geeld of aandere beleggingen dee as rap in echt geeld oetbetaald köant worden. Et geet meestal oawer geeld in kas en tegood op de rekkening.
Likwide duudt op vlöaiboar: disse middelen kö'j in iederen vörm geten dee'j mer weelt: loon betalen, skoold oflössen, een projekt vuursketen, een niej gebouw anskaffen, investeren, en zo wiedter. Bedriewe hebt dus aait gearne wat likwide middelen achter de haande, um kortlopende verplichtingen an te können. Van de andere kaante is een oawerskot van likwide middelen neet geunstig, umdet de seanten dan meender opleawert as wonnear'j der met zollen investeren of ze in et bedrief zollen stekken.
Strategiese vuurroaden of duurzame beleggingen, mesienes en vastgood zeent neet likwide. Toch kan nen oondernemmer neet-likwide zaken en zelfs et hele bedrief 'likwideren', dus ummezetten in geeld, verkopen. As een bedrief oawer den kop geet, wörd de inbodel, de mesienes en et paand verkocht, um de nog te betalen kösten of te lössen.
Et kan wean at der likwide passiva zo as leningen zeent. De netto likwide middelen zeent dan den optelsom van de likwide aktiva (wearde van et egene bezit) en de oetstoande passiva (geeld wat nog noar aandere partiejen mut).
De moate van likwiditeat van aktiva of passiva haank of van de tied woerin as ze haalboar (aktiva) of opeesboar (passiva) zeent. Zo hebt bievuurbeeld betalingen van klaanten ne hoge likwiditeat (positief) en oetstoande bevuurroadingsbetalingen van et bedrief zelf (negatief).